Өткен кездесулерде жіберген қателіктерімді қайталамауға тырыстым - Ержан Естанов

Фото: Ольга Апельганец

Балуан Шолақ спорт кешенінде "Alash Pride" клубының ұйымдастыруымен "Алаш Айбары" атты халықаралық жарыс өтті, деп хабарлайды Vesti.kz тілшісі.

66 келіге дейінгі салмақта "Alash Pride" командасының "арланы" Ержан Естанов (14-6-1) қырғыздың "WEF" командасының өкілі Қалыбек Жанибекұлы (лақап аты "Көкжал", 3-0-0) төрешілердің шешімі бойынша жеңді.

- Жекпе-жекке қырғыз "қасқыры" мен қазақтың "қасқыры" шықты. Сіздердің қолдауларыңызбен, құдайдың қалауымен қазақтың "қасқыры" бұл кездесуде басым түсті.

- Жекпе-жек көңіліңнен шықты ма?

- Сәл ойлағанымдай болмады. Бастысы жеңіске жеттім.

- Кездесу барысында бар күшіңді салмағаның көрініп тұрды...

- Иә. Мен жекпе-жек 3 раундқа созылады деп ойладым. Үшінші раундта бар өнерімді көрсетемін деп ойлағанмын, алайда кездесу 2 кезеңге ғана созылды.

- Көбінесе қарсыласыңды қылқындыруға тырыстың...

- Жоқ, жоқ. Өткен кездесулерімде қарсыластарыма қылқындыру әдісін қолданамын деп жеңіліп қалған болатынмын. Сол себепті қателігімді қайталамауға тырыстым. Жекпе-жекке қойылған мақсат, қарсыласымды қылқындырудан гөрі, соққының астына көбірек алу болды.

- Қарсыласыңыз мықты тұстарын атап өтсеңіз.

- Қырғыз спортшысы физикалық тұрғыдан мықты. Соққысы да ауыр.

- Қарсыласыңыз соңғы сәтте ауысты. Жаңа қарсыласыңызды зерттеуге уақыт аз болған жоқ па?

- Иә, зерттеу қиынға түсті. Алайда түптің түбінде қос спортшымен де жекпе-жек өткізер едім. Сол себепті кездесуге шыққанда қобалжу болған жоқ.