Жеңіліп көрмеген америкалық боксшы кіші Флойд Мейвезер Мәскеу маңындағы Жуковка ауылында өз атындағы академияны ресми түрде ашты, - деп хабарлайды
life.ru порталы.
Академия 2016 жылдың соңында пайда болғанымен ресми түрде 15 наурызда ашылды.
Мейвезер ММА чемпионы ирландық Конор Макгрегормен жекпе-жек өткізу үшін боксқа оралып отырғанын айтады. Мейвезердің сөзінше, әзірге келісімшартқа қол қойылмағанымен, ел аузынан түспейтін бұл жекпе-жек міндетті түрде өтуі керек. егер өтпесе, америкалық қайтадан зейнетке кетеді.
Еске салайық, БАҚ Мейвезер - Макгрегор жекпе-жегі маусым айында Лас-Вегаста өтеді деп хабар таратып қойған. Ал Мейвезер бұған қатысты өз ойын айтты.
"Мен ресейлік жанкүйерлерімнің қолдауынсыз рингке оралмайтын едім. Мәскеу - екінші үйім. Маған Макгрегормен Мәскеуде жұдырықтасуды ұсынса, бас тартпас едім", - дейді боксшы.
Америкалық боксшы кәсіпқой рингте 49 жекпе-жек өткізіп, бәрінде жеңіске жеткен. Осы арқылы ол аты аңызға айналған боксшы Рокки Марчианоның рекордын қайталады. Ал Forbes рейтингі бойынша Мейвезер бірнеше рет ең табысты боксшы ретінде мойындалған.
Жарнама