Бокстан Қазақстан құрамасының каптаны Қамшыбек Қоңқабаев кәсіпқойдағы алғашқы жеңісіне қатысты пікір білдірді. Спортшының сөзін
Olympic.kz беріп отыр.
Алматыда өткен бокс кешінде Қоңқабаев отандасы Иса Ақбербаевпен (20-1, 15 КО) кездесу өткізді. Бірінші ауыр салмақтағы жекпе-жек сегіз раундқа есептелгенімен, екіншісінде аяқталды - Қамшыбек екінші раундта техникалық нокаутпен жеңді.
"Кәсіпқой бокс пен әуесқой бокстың әрқайсысының өзіне тән ерекшеліктері болады. Кәсіпқой бокс он екі раундқа созылатындықтан жекпе-жекті асықпай бастап, төзімділікке жұмыс істейсің. Ал әуесқойда үш раунд болғандықтан уақыт аз, жекпе-жекті бірден бастап кетесің. Сондықтан, кәсіпқой бокс пен әуесқой бокстың жекпе-жектерінде де, жаттығулары мен раундтарында да айырмашылықтар болады.
Жекпе-жек барысында жаттықтырушылардың айтқан тактикасы бойынша жұмыс істедім. Бір қолмен қадағалай отыра, екінші қолмен шабуыл жасап отырдым. Жекпе-жек сегіз раундқа жоспарланған еді. Алайда, екінші раундта қарсыласты нокаутпен жеңдім. Кәсіпқой бокста жекпе-жек өткізуімдегі негізгі мақсат - Олимпиада ойындарына тыңғылықты дайындалу, мықты болып бару. Менің қазіргі таңда тек қана бір мақсатым бар. Ол - Олимпиада алтыны. Осыған орай, кәсіпқой бокста жекпе-жек өткізіп, өзімді жан-жақты шыңдап жатырмын. Кәсіпқой бокстағы жолым сәтті болғанымен Олимпиада алтынына дейін мен әуесқой бокстан кетпеймін", - дейді Қамшыбек Қоңқабаев.