Қазақстандық боксшы Әли Ахмедов Қуат Хамитовты қолдап, футболшыларға кеңес берді

Әли Ахмедов. © Instagram.com

Жартылай ауыр салмақта жұдырықтасатын қазақстандық кәсіпқой боксшы Әли Ахмедов Vesti.kz тілшісімен сұхбатында Қуат "Найман" Хамитовтың Қазақстанда футболға тыйым салу керек деп айтқанына қатысты пікірін білдірді.

"Меніңше, оның сөзінің жаны бар. Қазақстанда ММА, бокс сияқты жекпе-жектің спорт түрлері жақсы дамыған. Дегенмен қаржы футболға көп бөлінеді. Біздің футболшылардың нәтиже көрсетіп, дамитын уақыты жеткен сияқты. Шеберлігі жетпей жатса, орнын жақсы көңіл-күймен толтырып, ойынға толық берілу керек. Қолдан келмейтін дүние жоқ деп ойлаймын, қажырлы еңбек арқылы бәріне жетуге болады", - дейді Ахметов.

Еске салайық, Қуат Хамитов "Астананың" шотландиялық командадан алғашқы кездесуіндегі жеңілісінен кейін Қазақстанда футболға тыйым салуды ұсынды. Кейін Vesti.kz тілшісіне берген сұхбатында футболшыларымыздың орнында болса, спорттан кетіп қалатындығын айтқан. Ал тағы біраз уақыттан кейін Instagram желісіндегі парақшасына: "Жылына миллиард доллар бөлсе де, біздікілер ешқашан Әлем чемпионатында ойнай алмайды", - деп жазған.

Ал "Астана" командасы қарымта кездесуде шотландиялық "Селтикті" 4:3 есебімен жеңгеннен кейін Қазақстан футбол федерациясының баспасөз хатшысы Ербол Қайыров Хамитовке қатаң жауап жазған.

Хамитов мұның алдында да елдегі оқиғаларға байланысты қатты-қатты сөйлеген болатын. Қаңтар айында ол уақытша тіркеуге қатысты біреу оған келетін болса, оны көміп тастайтынын айтқан. Ал наурызда Хамитов қазақстандық боксшы Геннадий Головкинге спорттан кетуге кеңес берген болатын.

Әлеуметтік желілерде бөлісу