"Канело" лагеріндегі қазақстандық боксшы 35 жекпе-жегі бар америкалықпен жұдырықтасады
Сауль "Канело" Альварес пен Бобиржан Моминов. Сурет: қазақстандықтың инстаграм желісінен
Жартылай орта салмақта жұдырықтасатын қазақстандық Бобиржан Моминовтың (10-0, 8 КО) келесі қарсыласы аталды, - деп хабарлайды Vesti.kz.
28 жастағы Моминов Top Rank компаниясының 16 маусым Лас-Вегастағы MGM Grand аренасында өтетін шоуы аясында рингке оралады.
BoxRec ақпаратынша, қазақстандықтың келесі қарсыласы 26 жастағы америкалық Кэмерон Краел (17-15-3, 4 КО). Жекпе-жек сегіз раундқа есептелген.
Моминов кейінгі рет 23 наурыз АҚШ-тың Коста-Месе қаласында жұдырықтасып, жергілікті Джонатан Стилды (9-3-1, 6 КО) төрешілер шешімімен жеңді.
Моминов көпшілікке Сауль "Канело" Альварес (51-1-2, 35 КО) лагеріне қатысқанымен белгілі болды. 2017 жылы ол мексикалыққа қазақстандық Геннадий Головкинмен (38-1-1, 34 КО) бірінші жекпе-жегі алдында спарринг серігі болған.