Головкинді жеңгеннен кейін "Канело" миллиард долларлық жобамен келісімшарт жасасты

Орта салмақта WBC және WBA (Super) чемпионы мексикалық Сауль "Канело" Альварес (50-1-2, 34 КО) DAZN стримингтік қызметімен келісімшарт жасасты. Бұл туралы BoxingScene боксшының айналасындағы мәлімет көзіне сілтеме жасап хабарлап отыр.

DAZN қызметіндегі алғаш көрсетілім Альварестің 15 желтоқсан Нью-Йорктегі Madison Square Garden шаршы алаңындағы жекпе-жегі болады. Бұл күні мексикалық екінші орта салмақтағы WBA ұйымының regular чемпионы британиялық Рокки Филдингпен (27-1, 15 КО) жұдырықтасады. Стриминг қызметі мен боксшы арасындағы келісім бірнеше жекпе-жекке жасалады, алайда, дәл қанша екені нақтыланбаған.

Мұның алдында Альварестің жекпе-жегі HBO арнасында көрсетілген, алайда, 2019 жылы телеарна трансляциясын тоқтатады. Соңғы екі жекпе-жегінде "Канело" қазақстандық Геннадий Головкинмен (38-1-1, 34 КО) жұдырықтасқан.

DAZN қызметіне жазылудың айлық құны 9,99 доллар, ал Альварестің соңғы он жекпе-жегі HBO және Showtime арналарында 65-тен 75 долларға дейінгі бағада көрсетілген.

DAZN қызметінде боксқа британиялық промоутер Эдди Хирн жауапты. Мамырда ол құны миллиард доллар сегіз жылға есептелген келісімшарт жасасты. Келісім бойынша промоутер жылына 32 жекпе-жек өткізуі міндет. Айта кетейік, қазақстандық Данияр Елеусіновтың (3-0, 1 КО) ісін осы Хирн жүргізеді.

Ал қыркүйек соңында Хирн DAZN қызметі бойынша Головкинмен де келісімшарт жасасқысы келетінін айтқан. Қазақстандыққа ESPN және Showtime арналары да қызығып отыр. Головкин 2012 жылдан бастап HBO арнасымен келісімде болған.

Әлеуметтік желілерде бөлісу