"Канело" қыркүйекте Головкин орнына абсолют үшін жұдырықтаспақ

Сауль Альварес. Сурет: DAZN

Орта салмақта WBC (Franchise), WBA (Super) және IBF чемпионы мексикалық Сауль "Канело" Альварес (52-1-2, 35 КО) қыркүйекте WBO белбеуінің иегері америкалық Деметриус Андрадемен (28-0, 17 KO) жұдырықтасуы мүмкін, - деп хабарлайды ESPN.

Ақпарат бойынша, Альварестің ісін жүргізетін Golden Boy Promotions компаниясының президенті Эрик Гомес америкалық боксшының промоутері Эдди Хирнге бірнеше хабарлама жазып, артынша қоңырау шалған екен. Тараптар 14 қыркүйектегі жекпе-жек жайын талқылаған.

"Эрик Гомес және Роберт Диаспен (матчмейкер Golden Boy) сөйлестім. Олар Деметриус қыркүйектегі жекпе-жекке бос па деп сұрады. Әрине, "Иә" деген жауап болды. Бұл абсолют чемпион титулы үшін жекпе-жек, Деметриус 100 пайызға дайын. Алдағы бір-екі күн жағдайдың қалай өрбитінін көрсетеді", - дейді Хирн.

Гомес басқа да мүмкіндіктер барын айтты, дегенмен, Хирнмен бұл мәселені талқылағанын да мойындады.

"Иә, Хирнмен және өзге де промоутерлермен келіссөз жүргіздім. "Канелоға" тағы бірнеше қарсылас бар. Бәрін қарастырамыз. "Канело" жақында шешімін айтар. Андрадемен жекпе-жек бізге қызықты", - дейді GBP басшысы.

Осы аптада "Канело" түрлі дивизиондағы екі боксшыға ұсыныс жасаған. Мексикалықтың ұсынысын бірінші орта салмақта WBO чемпионы отандасы Хайме Мунгия (33-0, 26 КО) қарастырып жатса, жартылай ауыр салмақта WBO титулының иегері Сергей Ковалев (33-3-1, 28 КО) гонорардың төмендігіне байланысты ұсыныстан бас тартты.

Әлеуметтік желілерде бөлісу