"Жігіт сияқты жұдырықтас" - Альварес Головкиннің бапкерімен керісіп қалды

Мексикалық Сауль "Канело" Альварес Лос-Анджелестегі баспасөз мәслихаты кезінде қазақстандық Геннадий Головкиннің бапкері Абель Санчеспен сөзге келіп қалды.

Бапкер Альвареске алғашқы жекпе-жекте нокаутқа түсірем деген уәдесін орындамағанын есіне салғаннан кейін жағдай ушықты. Сонымен қатар, Санчес мексикалық боксшыны рингте жүгіре қашатыны үшін де сынға алды.

"Қарымта жекпе-жекте "Канело" батылдау қимылдап, жанкүйерлеріне алғашқы жекпе-жектегідей өтірік сөйлемейді деген үміттемін. Головкинді нокаутқа түсіруге тырысатын болар. Рингте жүгірмейсің деген үміттемін, "Канело". Ер жігіт сияқты жұдырықтас", - деді Санчес.

Альварес микрофонды алып, қарсыласына өзінің наразылығын білдірді. "Біріншіден, мені нокаутқа түсірем деп жанкүйерлеріңе сен де жалған сөйледің", - дейді Альварес Головкинге қаратып.

Бұған жауап ретінде Санчес "жүгіріп қашып жүрген адамды нокаутқа түсіру мүмкін еместігін" айтты. Осыдан кейін олар испан тілінде дауласып кетті. Бұл шараның видеосын мына жерден көре аласыздар.

Еске салайық, боксшылар арасында қарымта кездесу 5 мамырда Лас-Вегастағы T-Mobile аренасында өтеді.

Әлеуметтік желілерде бөлісу