Бокстан әлем чемпионы Жәнібек Әлімханұлы карьерасын аяқтауы мүмкін

Жәнібек Әлімханұлы. kfb.kz

2013 жылы өткен бокстан әуесқойлар арасында әлем чемпионы 24 жастағы Жәнібек Әлімханұлы әуесқой бокстағы карьерасын аяқтап, Ұлттық құрамадан кетті, деп хабарлайды Vesti.kz порталы.

"Иә, бұл шындық. Біз оған тағы бір мүмкіндік бергіміз келген еді. Бірақ оның өзі қоңырау шалып, "рақмет" деді. Сенім артқанымызға алғысын айтып, "Мырзағали аға, мен әуесқой бокстағы карьерамда аяқтаймын", - деді. Қазір денсаулығын түзетіп, ары қарай не боларын көремін. Мүмкін кәсіпқой боксқа ауысатын шығармын. Бірақ қазір әуесқой бокстан кетемін деді.

Сонымен қатар ол жалпы карьерасын аяқтап қалуы мүмкін екенін де айтты. Енді барлығын өзі шешеді. Жәнібек - қарапайым жігіт. Әрине, оның енді ғана өсіп келе жатқанында осындай шешім қабылдауы біз үшін де өкінішті. Ол өте тәжірибелі әрі талантты боксшы. Бірақ ол кетіп жатыр. Мұндай таланттарды табу оңай емес", - дейді бокстан Қазақстан құрамасының бас бапкері Мырзағали Айтжанов.

Еске салайық, 2016 жылғы Олимпиада ойындарынан кейін Әлімханұлы Қазақстан құрамасымен бірген бірінші жаттығу жиындарына қатысты. Тіпті салмағын 75 келіден 81 келіге ауыстырды. Оның карьерасындағы ең жоғарғы табыс - 2013 жылы Алматыда өткен әлем чемпионатындағы алтын жүлде. Сондай-ақ ол Азия ойындары мен Азия біріншілігінде де топ жарған.

Кәсіпқой бокста Әлімханұлы екі жекпе-жек өткізіп, екеуінде де жеңіске жетті. Соңғы рет ол әуесқойлар арасындағы Шымкентте өткен Қазақстан біріншілігінде бағын сынады. Бірақ ел біріншілігінің бірінші айналымында ол 19 жастағы Михайл Коханчиктен жеңіліп қалды.

Әлеуметтік желілерде бөлісу