Бекдәулет Ибрагимов қарсыласын нокдаунға түсіріп Азия чемпионатының екінші кезеңіне шықты

©Жігер Абенов

64 келіге дейін салмақта өнер көрсететін қазақстандық боксшы Бекдәулет Ибрагимов Ташкентте өтіп жатқан Азия чемпионатының бірінші айналымында қарсыласын нокдаунға түсіріп, турнирдің екінші айналымына шықты, деп сүйінші сұрайды Vesti.kz порталы.

Отандасымыз Азия чемпионатының бірінші айналымында малайзиялық Хир Азмимен кездескен еді. Екі боксшы арасындағы кездесудің бірінші раундты тең дәрежеде өткен еді. Екінші раунда Ибрагимов қарсыласын нокдаунға түсірген болатын. Дегенмен қарсылас жекпе-жектің соңына дейін шыдады. Кездесудің қорытындысы бойынша Ибрагимов төрешілердің шешімі бойынша жеңіске жетті.

Келесі айналымда Ибрагимов иорданиялық Обад Алкасбехпен кездеседі. Жекпе-жек ертең, 1 мамыр күні өтеді.

Ташкенттегі Азия чемпионатына 29 елден 200-ге тарта боксшы қатысады. Қытай, Үндістан, Иран, Йордания, Оңтүстік Корея, Моңғолия, Пәкістан, Шри-Ланка, Тәжікстан, Қазақстан мен Өзбекстан құрамалары толық құрамда (10 боксшыдан) қатысады.

Осы жылғы Азия чемпионатына Біріккен Араб Әмірлігінің боксшылары алғаш рет қатыспақ. Сондай-ақ 2002 жылдан бұл жарысқа қатыспай кеткен Сингапур елінің боксшылары да Ташкент төрінде жүлдеге таласатын болады.

Бүгін басталатын Азия чемпионатында Гамбургте (Германия) өтетін әлем чемпионатына 60 жолдама беріледі. Яғни, әр салмақта үздік алтылыққа енген боксшылар ие болады.

Әлеуметтік желілерде бөлісу